Hikayat Aneuk Jampoek (Kisah Nabi Sulaiman)

Deungoe lon kisah khabaran jameun

Masa keurajeun Nabi Mulia
Masa keurajeun Nabi Sulaiman
Yang mat hukuman ban sigom donya

Nibak siuroe nabi jak meuen
Ka deungon angen sajan seureta
Ka Nabi neuduk ateuh kurusi
Angen bapoet le ban siklep mata

Oh ban sare trok bak saboh teumpat
Geu musyawarah geuneukboh raja
Nabi neu tanyong bak bandum cicem
Teuh sare katem lon boh keuraja

Seu-ot poe jampok tuanku ampon

Nyoe pat sigam lon neuboh keuraja
Sebab sigam lon rupa ceudah that
Lagi ngon hebat meubule mata

Mata jih bulat babah meukuewet
Leupah that sabet sigam keu raja
Nabi Sulaiman masa nyan teuseungeh neukhem
Dum cicem laen surak meuburak

Teuma di su-ot burong keutok-tok

Meuhan jeut jampok bah lon keuraja

Sebab bak lon nyoe le that piasan

Lon peh canang prang oh malam jula

Teuma di su-ot tok-tok beuragoe

Hana meusoe-soe lake keuraja

Sedangkan dilon kupiah beusoe

Hana si uroe lake keu raja

Di cicem pala jigrop-grop lambong

Di cicem burong surak meuburak

Beurijuk bale surak disampeng

Cicem peureuleng ji sama-sama

Male jih that-that di apa jampok
Teuduk meuseupok mublek-blek mata

Teuma didame oleh keudidi

Si raja wali taboh keuraja

Lon puteh ule jeut keu polisi

Simirah pati jeut keu wedana

Cem pala subang keu geuchik gampong

Cicem mirahrueng guru sikula

Di ciem tulo jeut keupeneurangan

Cicem rajangan boeh keu panglima

Di cicem bruk-bruk taboh mak bidan

Sebab digopnyan geu kuwa-kuwa

Allahu Allah Allahu rahman 

Nabi Sulaiman yang kaya raya

Rukon Sembahyang

Pertama niet 

Dua berdiri

Lhee Teukeubi Rukon jih na

Peut Fatihah Dalam sembahyang

Ruku' Limoeng dalam bicara

Ke Nam 'Itidal

Ke Tujuh Sujud

Ke Lapan Taduek antara dua

Genap Siekureune Tahiyet akhee

Ke Siploh hase Tahyet tabaca

Siblah Seulawet

Duablah Saleum

Lheeblah Tamam tertib jih na

Aceh Lon Sayang

 Daerah aceh

Tanoh lon sayang

Nibak tempat nyan

Lon udep matee

Tanoh keuneubah

Indatu moyang

Lampoh dengoh blang

Luah bukoen lee

Keureuja udep

Na soe peutimang

Na soe peuseunang

Keureuja matee

Hatee nyang susah

Lon rasa seunang

Aceh lon sayang

Sampo'an matee

Na'at Nabi

Nabi hantom neumeuleumpoe 

malam uroe seulama-lama

Meuseumeungeub Nabi pi tan 

Nibak Zameun Sepanjang masa

Binatang kleud Han tom jiplueng 

jimeuteumeung ngen saidina

Lalat Nyamok pi hantom roh 

nibak tuboh yang mulia

Keue ngen likot deuh neukaloen 

hana teusom bak maulana

Neutoh iek-ek beukasan tan 

wajeb taulan ta peucaya

Hate Nabi hantom teunget 

yang na teupet cit dua mata

Meubayang tan dalam uroe 

hireuen laloe takalen rupa

Wate neuduek lam kawan le 

manyang bahoe dimaulana

yoh wiladah tan meuligan 

kaleuh khatan yoh masa na

Yang siploh nyoe sifeut Nabi 

wajeb turi tuha muda

Soe nyang hafai yang siploh nyoe 

tutong karam tuhan peulara